8. maj 2002

UPA2002/29

 

Meeqqat atuarfiat pillugu Inatsisartut peqqussutissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ILASSUTITUT ISUMALIUTISSIISSUTAA

siunnersuutip pingajussaanneerneqarnissaanut saqqummiunneqartoq

 

Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Ruth Heilmann, Siumut, siulittaasuugallartoq
Inatsisartuni ilaasortaq Jakob Sivertsen, Atassut, Naimangitsoq Petersen-imut sinniisussaq
Inatsisartuni ilaasortaq Lars Karl Jensen, Siumut
Inatsisartuni ilaasortaq Olga Poulsen, Inuit Ataqatigiit
Inatsisartuni ilaasortaq Mogens Kleist, Kattusseqatigiit

 

Inatsisartut Kultureqarnermut Ilinniartitaanermullu Ataatsimiititaliaata UPA2002-imi aappassaanneerinerup kingorna meeqqat atuarfiat pillugu Inatsisartut peqqussutissaattut siunnersuummut allannguutissatut siunnersuutigineqalersaartut misissuataarpai.

Aallarniutigalugu Inatsisartut Kultureqarnermut Ilinniartitaanermullu Ataatsimiititaliaata Naalakkersuisunit soorluttaaq Inatsisartut sinnerinit isumaliutissiissutip siamasissumik taperserneqarnera ataatsimiititaliap qujassutigissavaa.

Atuarfiup siulersuisuini atuartut sinniisaasa aningaasarsiaqartitaanissaannik ataatsimiititaliap inassuteqaataa Naalakkersuisunit akuersaarneqarmat ataatsimiititaliap naammagisimaarpaa. Ineqarfiutigalutik atuartunut angerlarsimaffiit eqqarsaatigalugit Naalakkersuisut ataatsimiititaliap kaammattuutaanut isumaqataanerat ataatsimiititaliamiittaaq pitsaasutut isigineqarpoq.

Annertusissamik immikkut ilinniartitsinermut tunngatillugu KANUKOKA-p isummernera ataatsimiititaliamit isumaqatigineqarmat Naalakkersuisunit tusaatissatut tiguneqarpoq. Pingajussaanerinissamut Naalakkersuisut allannguutissatut siunnersuummik saqqummiussissamaarput, peqqussutissap nutaap atortuulersinneqarnerani perorsaanikkut, aaqqissugaanikkut aningaasatigalugullu naatsorsuutigisat pigineqalernissaasa tungaanut ullumikkut aaqqissuussineq atuutiinnarallassalluni.

Ataatsimiititaliap innersuusaasa Naalakkersuisunit akuersaarneqarnerat ataatsimiititaliap nuanaarutigaa. Ataatsimiititaliap naatsorsuutigaa, nutaamik aaqqissuussinerup atortuulersinneqarnissaa pissasoq ataatsimiititaliaq Naalakkersuisunit isumasioqateqarluni ataatsimeereerpat.

Naalakkersuisut akissuteqaataatigut takuneqarsinnaavoq, sanaartugassat pillugit isumasioqatigiinnissami sanaartugassanut iluarsagassanullu aallaavissatut najoqqutassiinissamut oqallisissiamik Naalakkersuisut saqqummiussissamaarnerat ataatsimiititaliap naammagisimaarlugu malu-giniarpaa.

Piffissami ikaarsaariarfiusumi akunnerit ilinniartitsiviusussat pillugit Naalakkersuisut akissuteqaataat ataatsimiititaliami amerlanerussuteqartut Siumumeersut, Atassummeersup Kattusseqatigiinneersullu tusaatissatut tiguvaat. Taamaammat siunnersuutip aappassaanneerneqarneranut isumaliutissiissummi oqaatigineqaraluartutut tassunga tunngatillugu allannguutissatut siunnersuuteqaqqusineq ataatsimiititaliami amerlanerussuteqartut pisariaqarsorinngilaat.

Ataatsimiititaliami ikinnerussuteqartup Inuit Ataqatigiinneersuup ataatsimiititaliap inassuteqaataa aalajangiusimaannarusuppaa kissaatigalugulu allannguutissatut siunnersuumik saqqummiussisoqassasoq, taamaasilluni piffissami ikaarsaariarfiusumi atuartunut akunnerit ilinniartitsiviusussat ikilisinneqaqqissanngimmata.

Siunnersuutip pingajussaaneerneqarnissaanut siunnersuutip aappassaaneerneqarnerani Naalak-kersuisut akissuteqaamminni allannguutissatut siunnersuuteqassamaarnermittut allannguutissatuut siunnersuutaat ataatsimiititaliap isumaqatigiittup isumaqatigaa.

Isumaliutissiissutip tunniunneqareernerata kingorna kattuffinnit soqutigisaqaqatigiinnit IMAK aamma KANUKOKA-mit saaffiginnissutinik ataatsimiititaliaq tigusaqarpoq. Saaffiginnissutit taakku ataatsimiititaliap sukumiisumik misissorpai, kattuffiilli uparuaataat paasilluarpai sutigulli tamatigut malissinnaanngikkini oqaatigisariaqarlugu.

Peqqussutissatut siunnersuummi akunnerit ilinniartitsiviusussatut aalajangiussat KANUKOKA-p naammaginartutut isiginngilai. Ataatsimiititaliamit Naalakkersuisut akissuteqaataannut innersuussisoqassaaq, tassanimi uparuarneqarmat akunnerit amerlanerusut pitsaassutsikkut angusat pitsanngoriartissagaat ilimanaateqanngimmat. Peqqussutissatulli siunnersuutip nutaap atuartitsinerup pitsaassusia sukumiissusialu akerlianik qaffariartittussaavai. Taamaammat ataatsimiititaliaq isumaqarpoq akunnerit ilinniartitsiviusussat siunnersuummi aalajangersarneqartut atorlugit atuartut angusassaattut naatsorsuutigineqartut atuartitsinerup ingerlanneqarnissaanut naammattutut isigisariaqartut.

Atuarfiup pisortaata ilinniartitsisutut ilinniagaqarsimasuunissaa siunnersuummi saqqummiunneqanngimmat IMAK-ip pitsaanngitsutut uparuarpaa.

IMAK-mit tunngavilersuutitut saqqummiunneqartut ataatsimiititaliap isumaqatigiittup taperserpai Naalakkersuisunullu inassuteqaatigalugu siunnersuummik saqqummiussisoqassasoq, taamaa-silluni § 43 imm. 1-mi oqaaseqatigiinnut kingullernut ima ilanngussuseqassalluni: "...Pisortatut atorfinitsinneqartup atuartitsinikkut pisinnaasaqarnissaa piumasaqaataavoq".

Ataatsimiititaliami ikinnerussuteqartup Inuit Ataqatigiinnersuup ilanngullugu kissaatigaa IMAK-ip allannguutissatut siunnersuutaat naapertorlugu, § 48 imm. 2 imatut oqaasertaqalissasoq: "Peqqissummi pineqartumi Naalakkersuisut aalajangersakkanik aalajangersaasussaatillugit, taakku akuersissutigineqarsimassapput nalunaarutigineqarsimassallutillu ima piffissaliilluartigaluni, ukioq atuarfiusoq 2003/2004 piareersarneqarsinnaasunngorlugu".

Ataatsimiititaliami amerlanerussuteqartut Siumumeersut Atassumeersup Kattusseqatigiinneersullu meeqqat atuarfiat pillugu Inatsisartut peqqussutissaattut siunnersuut, ataatsimiititaliami amerlanerussuteqartut taamatullu ataatsimiititaliap tamarmiusup kaammattuutaannut naapertuuttumik Naalakkersuisut pingajussaaneriinerissamut allannguutissatut siunnersuutinik saqqummiussereerpata, taamatut iluseqarluni akuersissutigineqassasoq inassutigaat.

Ataatsimiititaliami ikinnerussuteqartup Inuit Ataqatigiinneersup Naalakkersuisut ataatsimiititaliami ikinnerussuteqartup taamatullu ataatsimiititaliap tamarmiusup kaammatuutigisaannut naapertuuttunik pingajussaanerissamut allannguutissatut siunnersuummik saqqummiussaqareerpata meeqqat atuarfiat pillugu Inatsisartut peqqussutissaattut siunnersuut akuersissutigineqassasoq inassutigaa.

Inatsisartut Kultureqarnermut Ilinniartitaanermullu Ataatsimiititaliaat taama oqaaseqarluni meeqqat atuarfiat pillugu Inatsisartut peqqussutissaattut siunnersuut pingajussaaniigassanngortippaa.

 

	Ruth Heilmann, Siumut siulittaasuugallartoq
Lars Karl Jensen, Siumut		Jakob Sivertsen, Atassut
Olga Poulsen, Inuit Ataqatigiit		Mogens Kleist, Kattusseqatigiit